呢一波疫情真係令我好頭痕，冇得出街食飯，變咗日日都要諗煮乜好，雖然唔愁買餸，但都總唔能夠日日煎雞翼咁Hea，一於出個新系列，同大家分享吓抗疫時期，用一菓欄嘅食材，可以煮到啲乜嘢！

 

打頭炮嘅係呢一個西班牙橡果黑毛豬肋條，豬肋條係豬肋骨中間嗰條肉，好近骨位，所以肉味都好夠！面頭白色嘅係筋膜，但係一啲都唔韌，仲會令呢一舊肉有種脆口嘅感覺。

由於係橡果豬，油花會特別重，令到肋條食落去鬆化得黎無渣。根據經驗，呢啲肉，攞嚟炆就最正！

呢一個食譜係上網集百家之大成，在因應返我屋企有乜醬而變化出嚟嘅！夾硬都可以叫做「韓式燒烤醬豬肋條」！

 

材料如下:

西班牙橡果黑毛豬肋條 一包（450g）

北海道洋蔥半個

蒜頭兩粒

韓式辣炒豬肉醬 （pork bulgogi sauce）1.5湯匙

蜜糖 1.5湯匙

豉油 1.5湯匙

鹽 半茶匙

水 5-8湯匙

 

做法如下:

1.豬肋條洗乾淨，切到同手指公一樣咁長

2.豬肋條出水，凍水落鑊，滾起即可印乾備用

3.洋蔥切圈圈，蒜頭拍扁，輕輕爆香一下

4.加入豬肋條，炒到金黃色

5.混合所有調味料+水 加入4.，兜勻

6.冚蓋，轉細火炆20-30分鐘

 

嗱，我用LC煲，鎖水能力比較強，所以我就加咗三湯匙水，如果其他煲就要因應情況加水，以免痴底。

 

坦白講，我真係求其煮，因為我連韓國燒烤醬都冇😌，見屋企有一樽辣炒豬肉醬（pork bulgogi sauce），覺得平時啲燒烤醬甜甜地就加啲蜜糖，要加水再加啲鹽加啲豉油咁。

屎忽撞棍撞出嚟又幾好食，所以分享吓，煲野整出嚟，睇落去係好多油，係豬肋條本身分泌出嚟嘅油，好正常嘅！啲韓國嘢都係咁㗎啦！

咁如果重口味啲，唔怕油，絕對係可以加啲椰菜落去炒下，一鑊過乜都有！

 

頂…食太快。。無影相呀！！！